2014-ᒥᓂᑦ, ᐊᕐᖁᑕᐅᕗᒍᑦ ᐱᒍᓐᓇᓯᕙᓪᓕᐊᓂᖓᓄᑦ ᐃᓅᓯᒃᑯᓗ ᐃᓚᐅᒍᓐᓇᓯᐊᕐᓂᖓᓂᒃ ᓄᓇᕕᐅᑉ ᐅᕕᒐᕐᑐᖏᑦᑕ. ᔮᓱᐊ ᓂᑕᓐ ᑭᐊᑦᓗ ᔫᑎ ᓇᓗᐃᔫᓪᓗ ᐃᓚᐅᑦᓯᐊᓂᖓᓄᑦ ᐊᖓᔪᕐᖃᐅᖃᑎᒌᑦᓱᑎᒃ ᑲᑎᒪᔨᓄᑦ, ᑕᒪᒃᑯᐊ ᓇᓪᓕᐅᓂᕐᓯᐅᕈᑏᑦ ᖃᐅᒪᑎᑦᓯᓚᖓᔪᑦ ᓄᓇᕕᐅᑉ ᐅᕕᒐᕐᑐᖏᑦᑕ ᐃᑲᔪᕐᓯᓯᒪᓂᖓᓂᒃ ᓄᐃᑕᑎᑦᓯᔨᐅᑦᓱᑎᒃ ᐅᕕᒐᕐᑐᓕᒫᓂᒃ.
ᑖᓐᓇ ᑎᑭᐅᑎᓂᕗᑦ ᐅᓪᓗᒥᒧᑦ ᓇᓗᓀᕈᒪᓪᓗᒍ, ᓄᕃᒃᑯᑦ ᓄᐃᑦᓯᓂᖃᓚᐅᔪᑦ ᖁᓕᓂᒃ ᐊᕐᕌᒍᕐᓯᐅᓕᕐᓂᒧᑦ ᑕᕐᓴᕆᔭᐅᓂᐊᕐᑐᒥᒃ, ᓄᐃᑕᑎᑕᐅᓂᐊᕐᑎᓗᒍ 2024-2025 ᐃᓕᓐᓂᐊᓇᐅᑉ ᐊᕐᕌᒍᖓᓂ, ᐱᒋᐊᕐᑎᓯᑦᓱᑎᓪᓗ ᐊᒥᓱᓂᒃ ᐊᐅᓚᑦᔭᕆᐊᕈᑎᐅᔪᓂᒃ ᓄᓇᕕᓕᒫᒥ.
ᖁᓕᓂᒃ ᐊᕐᕌᒍᕐᑐᓕᕐᓂᖅ
ᑕᒡᒎᓇ ᐊᓕᐊᓇᕐᑐᑯᑦ ᑐᓵᒍᒥᓇᕐᑐᑯᑦ, ᐲᑐᕆᔅ ᑎᐊ ᑖᓐᔨᐊ ᐃᓐᓈᕈᓕᓪᓗ ᑐᖕᖓᓱᑦᑎᓯᓚᐅᔫᒃ ᔮᓱᐊ ᓃᑕᓐ ᑭᐊᑦᓗᒥᒃ ᔫᑎ ᓇᓗᐃᔪᒥᓪᓗ ᐅᓂᒃᑳᑎᑦᓱᒋᒃ ᐱᓇᓱᐊᓲᖏᓐᓂᒃ ᖃᓄᕐᓗ ᓄᕐᕃᑯᑦ ᓱᕐᕃᑎᒋᓯᒪᓂᖓᓂᒃ ᓄᓇᕕᐅᑉ ᐅᕕᒐᕐᑐᖏᓐᓂᒃ. ᑖᓂᐊ ᐃᑉᐱᓂᐊᕐᓇᑐᒻᒪᕆᒻᒥᒃ ᐅᓂᒃᑳᓚᐅᔪᖅ ᐊᓈᓇᐅᑦᓱᓂ ᐊᑑᑎᓯᒪᔭᒥᓂᒃ ᓄᕐᕃᑯᓐᓄᑦ ᐃᓚᐅᔨᐊᖃᕐᓯᒪᒐᒥ.
ᓯᑎᒻᐱᕆ 24-ᒥᑦ ᐅᒃᑑᐱᕆ 3, 2024-ᒧᑦ, 11 ᐃᓚᐅᓚᐅᔪᑦ ᐱᒍᓐᓇᑑᓂᕐᒥᓂᒃ ᐱᓯᑎᐅᓂᕐᒥᓂᓪᓗ ᓄᐃᑦᓯᓱᑎᒃ ᑮᒃᑭᓕᐅᕐᓂᑯᑦ ᑕᕐᓴᓕᐅᕐᓱᒋᑦ ᓄᕐᕃᓅᓕᖓᔪᓂᒃ.
ᓇᑯᕐᒦᑐᒍᑦ ᐃᓚᐅᓚᐅᔪᓕᒫᓂᒃ ᑮᒃᑭᓕᐅᕐᓂᒧᑦ ᐱᓕᐅᑎᓂᕐᒧᑦ ᐅᖓᓯᑦᑐᒦᒐᓗᐊᕐᓱᑎᒃ!
ᓄᕐᕃᑯᓐᓄᑦ, ᖁᓕᓂᒃ ᐊᕐᕌᒍᕐᑐᓕᕐᓂᖅ ᓄᐃᑕᑎᑦᓯᒍᑎᐅᕗᖅ 1,284-ᓂᒃ ᐃᓚᐅᓯᒪᓕᕐᑐᓂᒃ 14-ᓂᑦ ᓄᓇᓕᓐᓂᑦ, 66 ᐃᓚᐅᓯᒪᓕᕐᑐᑦ ᐃᑳᕐᑐᓂ, 35-ᓗ ᐃᓄᑐᐃᓐᓀᑦ ᐃᓕᓐᓂᐊᑎᑕᐅᓯᒪᑎᓪᓗᒋᑦ ᑐᑦᑐᐃᑯᑦ. ᐱᒍᓐᓇᓯᓯᒪᒍᑎᑦᑎᓂᒃ ᖃᐅᔨᒋᐊᓪᓚᕈᒪᒍᑦᓯ ᐅᖃᐅᓯᒃᑯᑦ ᐊᑦᔨᖑᐊᑎᒍᓪᓗ, ᓀᑦᑑᓱᓂ ᐊᐅᓚᔪᖅ ᓄᐃᑕᐅᓯᒪᔪᖅ Bruno Chasse-ᒧᑦ IDEO-ᑯᑦ ᓴᕐᕿᑎᕆᔨᖏᓐᓂᑦ ᐱᓯᒪᔪᒧᑦ.
ᑕᓯᔪᐊᑦ ᐊᒥᓱᓕᐊᖑᒪᖕᖏᓱᑎᒃ ᓴᕐᕿᑕᐅᔪᑦ ᓄᕐᕃᑯᓐᓄᑦ ᐁᑕ ᓴᕕᐊᕐᔫᑉ ᓴᓪᓗᒥᐅᑉ ᐊᓪᓚᖑᐊᕐᓯᒪᔮᐱᖏᓐᓂᒃ ᑕᕐᓴᓕᐅᕐᓯᒪᑦᓱᑎᒃ. ᖁᓕᓂᒃ ᐊᕐᕌᒍᖃᓕᕐᓂᒧᑦ ᓇᓪᓕᐅᓂᕐᓯᐅᕈᑎᐅᑦᓱᑎᒃ ᓄᐃᑕᐅᓚᕿᓯᒪᔪᑦ ᐁᑦᑐᑑᑎᐅᑦᓱᑎᓪᓗ 2024-2025-ᒥ ᐱᓇᓱᐊᕐᑕᐅᔪᓂ ᐃᓚᐅᓯᒪᔪᓕᒫᓄᑦ, ᐃᑲᔪᕐᑎᐅᕙᑦᑐᓄᑦ ᐱᓇᓱᐊᖃᑎᐅᕙᑦᑐᓄᓪᓗ.
« ᐃᓱᒪᓕᕋᒪ ᓄᕐᕃᑯᓪᓂᒃ, ᐃᓱᒪᓲᖑᔪᐊ ᑐᑐᐃᑦ ᓇᑦᔪᖏᑦ ᐃᓕᖓᒋᐊᖏᑦ Jeunes Karibus-ᑯᓐᓄᑦ. ᐃᓱᖕᖓᐊᓱᖓᓗ ᐊᔭᒑᕈᓯᕐᒥᒃ ᐃᓄᐃᑦ ᐱᖕᖑᐊᕈᓯᒋᓯᒪᔭᖓᓂ, ᐅᓪᓗᒥᒧᑦ ᐊᑐᕐᑕᐅᓲᖑᖏᓐᓇᑐᒥᒃ. ᑐᐱᖅ ᐱᒻᒪᕆᐊᓘᒻᒥᔪᑦ ᓄᐃᑕᑎᑦᓯᒍᑎᐅᒐᒥ ᓯᐊᕆᔭᐅᑎᑯᑖᒃᑯᑦ ᐃᖏᕐᑑᒥᒃ ᐅᑭᐅᑯᑦ ᒪᙯᑉᐸᑐᓂᓪᓗ ᐅᐱᕐᖔᒥ. ᓄᐃᑕᑎᑦᓯᒍᑎᐅᔪᖅ ᓯᕗᓪᓕᕕᓂᑦᑎᓂᒃ. » — ᐁᑕ ᓴᕕᐊᕐᔪᒃ
ᐅᑦᑐᐱᕆ 5, 2025, ᓄᕐᕃᑦ ᑲᑎᑎᑦᓯᓚᐅᔪᖅ ᐃᑲᔪᕐᑎᐅᕙᑦᑐᓂᒃ, ᐱᓇᓱᐊᖃᑎᐅᕙᑦᑐᓂᒃ ᑯᑦᔪᐊᒥᐅᓪᓗ ᓇᓪᓕᐅᓂᕐᓯᐅᖃᑎᒋᑦᓱᒋᑦ ᑕᑯᑦᓴᐅᓱᑎᒃ Facebook-ᑯᑦ, ᓇᑯᕐᒦᑕᕗᑦ ᖃᕐᔪᐃᑦ ᐅᕕᒐᕐᑐᐃᑦ ᑲᑎᒪᔨᖏᑦ ᑕᑯᑦᓴᐅᑎᑦᓯᓯᒪᒻᒪᑕ.
ᓂᕆᒻᒪᑎᑕᐅᑦᓱᑎᒃ ᒪᒪᕐᑐᒪᕆᐊᓗᓐᓂᒃ ᐃᒐᔭᐅᔪᕕᓂᕐᓂᒃ ᐃᓱᐊᕐᓯᕕᒻᒥ ᐃᒐᔨᓄᑦ, ᙯᕐᖁᔭᐅᒪᔪᑦ ᑐᓵᑎᑕᐅᓚᐅᔪᒻᒥᔪᑦ ᐅᓂᒃᑳᑐᓂᒃ Valerie Raymond-ᒥᒃ ᐱᒋᐊᕐᑎᓯᓯᒪᔪᒥᒃ, ᐊᓯᖏᓐᓂᓗ ᐃᓚᐅᓪᓚᕆᑦᓯᒪᔪᓂᒃ ᐱᓇᓱᐊᕐᓯᒪᓕᕐᓂᖓᓄᑦ ᓄᕐᕃᑦ: ᒫᑕ ᑯᔦᒃ, ᑐᓄ ᓇᐹᕐᑐᒃ, ᔮᓱᐊ ᓂᑕᓐ ᑭᐊᑦᓗ, ᔫᑎ ᓇᓗᐃᔪᖅ, ᔨᓂ ᑐᐴᐃᓄ ᑲᑎᕕᒃ ᐃᓂᓴᕐᓂᕆᔨᒃᑯᖏᓐᓂᑦ. ᖁᕕᐊᓱᖃᑎᒌᓐᓂᖅ ᐃᓱᓕᒍᑎᖃᕐᑎᑕᐅᓚᐅᔪᖅ ᓂᑦᔭᓗᑦᑖᑎᓪᓗᒋᒃ ᒍᐃᓖᔅ ᑕᒍᕐᓈᖅ ᑳᑎ ᓯᓅᐹᓪᓗ, ᐊᒥᓱᑦ ᖁᕕᐊᓱᖃᑎᒌᓚᐅᔪᑦ ᑖᓂᓯᕐᓱᑎᒃ, ᐃᔪᖃᑎᒌᑦᓱᑎᓱᓪᓗ.
